Gunnlaug Lien Myhr blir tildelt Prisen for folkemusikk og folkedans 2025

Det er vanskeleg å plassere ein tradisjonsbærar som Gunnlaug Lien Myhr i éin kategori. I over 50 år har ho vore aktiv på folkemusikk- og folkedansfeltet – ikkje berre som utøvar på song, dans og fele – men òg som formidlar, lærar, samlar, komponist, arrangør, produsent, forfattar og dommar i både song, dans og spel.

Gunnlaug er eit velkjent namn – både for oss og for alle som brenn for norsk folkemusikk og folkedans. Ho har inspirert generasjonar av musikarar og dansarar, og viser ein utrøytteleg lidenskap for miljøet – særlig for tradisjonen i Hallingdal, som alltid har vore inspirasjonen og hjertesaka hennar. Blant anna har ho gjeve ut fleire CD-ar med materiale henta frå folkesongtradisjonen i Hallingdal. I tillegg platene med gruppa Tiriltunga, folkesong-gruppa som vart nominert til spelmannspris.

Med dette som bakteppe har styret ved Norsk senter for folkemusikk og folkedans gleda av å tildele Gunnlaug Lien Myhr Prisen for folkemusikk og folkedans 2025.

Grunngjevinga løftar fram ei lang rekkje merittar: Gunnlaug har markert seg som utøvar på Landskappleiken gjennom mange år, med Kongepokal i hardingfeledans og toppresultat i klasse A både i kveding og dans. Ho har òg bidrege som forskar og samlar – mellom anna med boka Folkesong i Hallingdal (2015), eit storverk med 600 folketonar og tilhørande CD. I tillegg har ho – saman med mannen sin – vore ei drivkraft for ungdom gjennom 30 års instruktørarbeid på ungdomshuset Hugnadheim på Torpo.

Prisen blir delt ut under årets representantskapsmøte i Norsk senter for folkemusikk og folkedans, som finn stad i Trondheim 31. oktober 2025. Sidan 1993 har prisen heidra personar som har gjort ein ekstraordinær innsats for folkemusikk og folkedans, og vinnaren blir vald av styret blant kandidatar nominerte av miljøet sjølv. Prisen er på 30 000 kroner og ei heiderspåskjønning.

Som prisvinnar held Gunnlaug eit faglig innlegg under representantskapsmøtet, med tema: Tradisjonar i dvale – som tek for seg songen, langeleiken og springardansen. Vi gratulerer Gunnlaug Lien Myhr med ein velfortent pris, og takkar henne for den uvurderlege innsatsen ho har lagt ned for å løfte fram og vidareføre norsk folkemusikk og folkedans – til glede for både notida og framtida.

Bilete: Gunnlaug Lien Myhr